大雨 6月30日 星期六  

放第三個星期六嘅暑假,而家經常性提醒自己搵工唔急得嚟,其實都唔算叫做咩提醒,應該係要接受一下現實,人地間公司請唔請我,到最後嘅話事權都响人地度,而我只可以做嘅只有等......等......等......有消息當然好啦,冇都唔緊要,不過會開心擔心之後嘅日子,因為揀六月嚟搵工會比較麻煩,其中有一小群嘅中七A-Level放榜,就會跟手出嚟搵嘢撈,雖然我搵嘅工係靠老練嘅經驗,但係多左一班無謂人出嚟爭食,市場個價位將會下調,連帶我可能都會受唔少嘅影響,所以再唔快D比我搵到工,就大大麻煩喇~

後記: 穿耳洞的男人比較適合結婚，他們經歷過痛苦，而且會買首飾。

陣雨轉雷雨 6月29日 星期五  

今日再得到一次見工嘅機會,內心非常非常之咁興奮,由收到電話嘅那一刻開始,我個腦又不停咁諗呢次要點講先好,同埋唔好咁緊張,因為自從兩年前見過一次工之後,加上對上一次好順利嘅關係,所以我對於見工嘅技巧係非常之咁膚淺,經過上星期嘅失敗之後,我已經有所醒覺喇! 絕對唔可以再犯同樣嘅錯誤,每當有人叫我介紹一下自己嘅時候,就會突然之間變得好緊張,巴巴結結咁講一大堆舊公司嘅情況,而忽略左最重要嘅部分......應該重點咁介紹自己,舊公司其實一句起兩句止,之後好應該簡單咁hard sell自己,例如我係一個勤奮而好動嘅人之類,可惜因為太緊張而講太多廢話......今日終於都有些少改變,呢次嘅面試我比自己六十分啦~

後記: 做有智慧的人很簡單：只要想一些愚蠢的話，然後不說出來就行了。

有雨 6月28日 星期四  

今日終於都睇哂小學生機械人動畫三步曲,分別係1991年嘅"絕對無敵",1992年嘅"元氣爆發",仲有就係1993年嘅"熱血最強",當年响TVB播過一次,我最記得係做完閃電傳真機之後嘅卡通時段播出,之後就再冇機會翻睇,今年難得有一個咁特別嘅暑假,仲要係無了期,當然唔可以錯過啦,雖然係翻睇但真係非常之有味道,以前細路仔時代,TVB同亞視播咩卡通就一定要睇咩,唔少得嘅當然係用廣東話嚟配音啦,起碼夠地道先嘛! 而今次我睇嘅係原裝日本版本,正所謂食地道菜就要食得原汁原味,我深深感受得到一套成功嘅動畫背後,其中靈魂在於畫功以及配音方面,若果再加上一個好嘅故仔,好大機會會成為一套經典嘅動畫~

後記: 我們都聽說過，一百萬隻猴子敲打一百萬台打字機，最後會複製出全套莎士比亞作品。現在有了網際網絡，我們已經知道這不是事實。

密雲 6月27日 星期三  

講你都唔信,自從星期日夜晚同朋友去睇完戲之後,由星期一直到今日星期三,連續三日都冇踏出過屋企門口半步,真係得人驚呀! 如果唔係母親大人今朝叫我倒垃圾,我諗都唔使指意會行出大門口......而家真係冇必要都廢事落街,唔知道係唔想行定係冇心情,之但係我明明想出去行下,或許係落街跑下步,但總係提唔起勁,一起身就對住部電腦,基本上同以前返工嘅日子差唔多,唯一唔同嘅就係响屋企有絕對嘅自由,好無聊呀~

後記: 既然便利店全年無休，為什麼門上有鎖？

多雲雷雨 6月26日 星期二  

人生首次覺得停頓咁樣,而家工又唔使返,書又唔想讀,每日就慢無目的咁等待,雖然放假帶比我嘅感覺好爽,但係長此落去都唔係辦法,但係我又可以點樣呢? 如果一日仲未搵到新工作,就唔可以亂咁使錢,而家想出街行下,睇場戲或者係食餐飯,甚至係想去游泳池游水,都要慳得就慳可免則免,因為真係唔知幾時先至搵得到,始終話事權响人地度,人地唔請我都控制唔到,唯有一直等運到啦,搵工當然仲要繼續落去,唔可以比佢停~

後記: 同義詞的同義詞是什麼？

晴轉雷陣雨 6月25日 星期一  

一個禮拜嘅新開始又嚟喇,我依然要呆在家中,守候著電話嘅旁邊,可惜一次都冇響過,由工作天嘅開始等到工作天嘅完結,一分一秒嘅過去令人愈來愈灰心,慢慢開始發覺過強嘅自信心的確係搵唔到食嘅,朋友都對我講慢慢嚟,搵工唔急得嚟! 上星期難得有一次嘅面試機會,可惜表現得實在強差人意,心裡想嘅嘢完全冇辦法表達出嚟,希望今個禮拜有多一次機會啦......

尋晚走去睇戲放鬆一下,套戲應該好少人會知道,戲名叫做"暴走四壯士",係一套浪漫笑片,何謂浪漫呢? 浪漫係我個人嘅感覺,冇得解釋,總之就係講四個中坑為左重拾失去嘅浪漫生活,以暴走族之名揸電單車去旅遊,一大堆一大堆嘅笑料,途中仲搞出個大頭佛,最後四條麻甩佬都尋找得到自己嘅人生~

後記: 如果輸贏不是最重要的，為什麼要計分呢？

熱 6月23日 星期六   

話咁快就過左一個禮拜,呢個禮拜都係好平淡咁渡過,身心都得到完全嘅放鬆和休息,充足嘅睡眠,再加上適量嘅運動,雖然每一日都係無所事事,仲要擔心搵唔搵到新工,但係呢種日子嘅感覺真係好爽,係真真正正咁比自己放假,將工作完完全全咁忘記,一日又一日咁比佢過去,心裡面冇哂"時間"呢一種觀念,總之嚟一個食飽就瞓,瞓飽就食,好好咁享受一下夢寐以求嘅退休生活,呢個禮拜真係好好feel,如果間唔中可以過翻呢d咁嘅半退休生活,簡直係人生一樂也~

後記: 戀愛中的男人結婚之前都是不完整的，結婚後則是完了。

夏至 6月22日 星期五  

原來我也會為見工而緊張,尋晚接完電話之後,我就唔理三七廿一,先將最重要嘅資料收拾好,然後放鬆咁食餐安樂茶飯,跟住沖返個靚涼,好唔容易咁搵返想當年工業學院派比我嘅"求職基本功",我再三咁仔細閱讀每一頁每一個文字,發覺自己可能out哂day,本書仔所列出種種嘅問題,我幾乎大部分第一時間都答唔出嚟,如果到見工嘅時候比人問起,到時真係口啞啞咁就死得人多喇! 最後我花個半鐘頭去重新咁認識自己,好喇......已經係晚上嘅十二點半係時候要瞓,但係瞓極都瞓唔著,真係咩絕招都用齊,就係咁樣搞下搞下好夜先至入睡,不過準時起得到身都算唔錯,經過一輪梳洗之後,帶齊裝備,上車出發~

後記: 我一直希望能成為世界最後一個男人，好看看那些女人是不是全都在騙我。

焗汗 6月21日 星期四  

好平平靜靜嘅一日,朝頭早勁好瞓,一覺瞓醒已經係十點幾,之後都係百無了賴,同樣係等足一日電話,原本已經對今後係死左條心,都已經夜晚六點半鐘喇,應該唔會再有公司打電話嚟......都唔知話好彩定咁啱得咁橋,尋日仲埋怨緊日等夜等,正正想放棄今日嘅時候,神秘嘅電話突然之間響起,我上前一睇下個手機來電,竟然係"號碼保密",心諗一定係d銀行問我借唔借錢,或者係d極度無聊嘅推銷電話,電話響左五下之後,把心一橫聽一次唔會死嘅,接電話之後原來係其士工程約我去interview呀,簡直開心到震,我好爽快咁約左聽朝十點上去其士工程,我已經準備好哂一切喇~

後記: 要得到男人的心，最快方法就是靠著他的胸膛。

又悶又熱 6月20日 星期三  

過了失業嘅第五日,原本嘅一股搵工幹勁一下子就沉沒了,或者呢幾日都只係留响屋企,對住四道石屎牆對足一日,生活完全冇哂趣味同意義,我之前細心挑選嘅幾間公司,到今日都冇回音,電話已經廿四跟身,就連去廁所開大都帶住,總之一定唔會miss call啦! 其實我都預左起碼要等一個多月先搵到新工,係咪我自信心過強呢? 我總覺得自己會好快搵到工,係好快好快呀,可惜事與願違,世間上總會出現例外,好睇自己接唔接受得到,我辭職係有哂計畫,時間我還可以等,雖然我仲對自己好有信心,但係正所謂"你揀人,人也揀你",當係留多d時間同機會比人地啦~

後記: 女人不想聽你怎樣想，只想聽她自己的想法，以較低沉的聲音說出來。